അദ്ദിക്ർ

ഭാരം വഹിക്കുന്നതിന് ഭക്ഷ്യയോഗ്യമായ കന്നുകാലികളില്‍ പെട്ട കാള, പോത്ത്, ഒട്ടകം എന്നിവയെയും കമ്പിളിയും വിരിപ്പും ഉണ്ടാക്കുന്നതിനുള്ള രോമങ്ങള്‍ എടുക്കുന്നതിന് ചെമ്മരിയാട്, കോലാട്, ഒട്ടകം തുടങ്ങിയവയെയും ഉപയോഗിക്കുന്നു. 16: 66 ല്‍, നിശ്ചയം നിങ്ങള്‍ക്ക് കന്നുകാലികളില്‍ ഒരു ഗുണപാഠമുണ്ട്, അവയുടെ അകിടില്‍ നിന്ന് പച്ച നിറത്തിലുള്ള ചാണകത്തിന്‍റെയും ചുവന്ന നിറത്തിലുള്ള രക്തത്തിന്‍റെയും ഇടയില്‍ നിന്ന് വെള്ള നിറത്തിലുള്ള, കുടിക്കുന്നവര്‍ക്ക് ആനന്ദം നല്‍കുന്ന നറും പാല്‍ നാം നിങ്ങളെ കുടിപ്പിക്കുന്നു എന്നും; 16: 80 ല്‍, അല്ലാഹു നിങ്ങള്‍ക്ക് നിങ്ങളുടെ വീടുകളെ ശാന്തിനിര്‍ഭരമായ വിശ്രമസങ്കേതങ്ങളാക്കിയിരിക്കുന്നു, മൃഗത്തോലുകള്‍ കൊണ്ട് നിങ്ങള്‍ക്ക് ഭവനങ്ങളുണ്ടാക്കിത്തന്നിരിക്കുന്നു, അവ സഞ്ചാരവേളയിലും സ്ഥിരവാസവേളയിലും നിങ്ങള്‍ക്ക് ഉപയോഗപ്പെടുത്താന്‍ കഴിയുന്ന വിധം ലഘുവാക്കിയിരിക്കുന്നു, അവയുടെ (ചെമ്മരിയാടിന്‍റെയും കോലാടിന്‍റെയും ഒട്ടകത്തിന്‍റെയും) രോമങ്ങളില്‍ നിന്ന് നിങ്ങള്‍ക്ക് ഒരു നിശ്ചിത അവധി വരെ ഉപയോഗപ്പെടുത്താവുന്ന ധാരാളം സാധനസാമഗ്രികള്‍ ഉണ്ടാക്കിത്തന്നിരിക്കുന്നു എന്നും പറഞ്ഞിട്ടുണ്ട്. 36: 71-73 സൂക്തങ്ങളില്‍, നമ്മുടെ കൈകളാല്‍ സൃഷ്ടിച്ചിട്ടുള്ള കന്നുകാലികളെ അവരുടെ ഉടമസ്ഥതയിലാക്കിയിരിക്കുന്നു എന്നത് അവര്‍ കാണുന്നില്ലേ, നാം അവയെ അവര്‍ക്ക് വിധേയമാക്കിക്കൊടുത്തിരിക്കുന്നു. അവയില്‍ ചിലതിന്മേല്‍ അവര്‍ സഞ്ചരിക്കുകയും ചിലതിനെ അവര്‍ ഭക്ഷിക്കുകയും ചെയ്യുന്നു, അവയില്‍ അവര്‍ക്ക് ധാരാളം ഉപകാരങ്ങളും പാനീയവുമുണ്ട്, അപ്പോള്‍ അവര്‍ സ്രഷ്ടാവിനെ ഏകനായി അംഗീകരിച്ച് നന്ദി പ്രകടിപ്പിക്കുന്നവരാകുന്നില്ലെയോ എന്ന് ചോദിച്ചിട്ടുണ്ട്. കന്നുകാലികളുടെ കൊമ്പുകള്‍ കൊണ്ട് ചീര്‍പ്പ്, കൗതുകവസ്തുക്കള്‍, കത്തിപ്പിടികള്‍ മുതലായവയും അവയുടെ തുകലുകള്‍ കൊണ്ട് ചെരുപ്പ്, ബാഗ്, ബെല്‍റ്റ്, പേഴ്സ് മുതലായവയുമുണ്ടാക്കുന്നു. പഞ്ചസാര ഫാക്ടറികളില്‍ അവയുടെ എല്ലുകള്‍ ഉപയോഗപ്പെടുത്തുന്നുണ്ട്. ആധുനികലോകത്ത് മാംസത്തിനും മറ്റു ആവശ്യങ്ങള്‍ക്കും വേണ്ടി കന്നുകാലികളെത്തന്നെയും ക്ലോണിംഗ് മുഖേന ഉത്പാദിപ്പിച്ച് തുടങ്ങിയിട്ടുണ്ട്.

ചുരുക്കത്തില്‍ മനുഷ്യന്‍റെയും അവന് ലഭിച്ചിരിക്കുന്ന കൃഷി, തോട്ടങ്ങള്‍, കന്നുകാലികള്‍ തുടങ്ങി എല്ലാ അനുഗ്രഹങ്ങളുടെയും ദാതാവും ഉടമയും അല്ലാഹുവാകുന്നു. അവ ഉപയോഗപ്പെടുത്തേണ്ടത് അവന്‍റെ വിധിവിലക്കുകള്‍ക്കനുസരിച്ച് മാത്രമാണ് എന്നിരിക്കെ അല്ലാഹു അല്ലാത്തവര്‍ക്ക് അവന്‍റെ തൃപ്തിക്ക് വിരുദ്ധമായി നന്ദി പ്രകടിപ്പിക്കുന്നതും അവന്‍റേതല്ലാത്ത പരിധികളും ആചാരങ്ങളും പാലിക്കുന്നതും അതിര് കവിയലും പിശാചിന്‍റെ കാല്‍പാടുകള്‍ പിന്തുടരലുമാണ്. ഭക്ഷണത്തിനും മറ്റുചില ഉപയോഗങ്ങള്‍ക്കുമാണ് അല്ലാഹു അവയെല്ലാം മനുഷ്യന് നല്‍കിയിട്ടുള്ളത്, അല്ലാതെ ദുരാചാരങ്ങള്‍ വഴി അവയെ നിഷിദ്ധമാക്കി വെക്കാനല്ല. അല്ലാഹു നല്‍കിയ ഭക്ഷണവിഭവങ്ങളുടെ മേല്‍ മനുഷ്യര്‍ തന്നിഷ്ടപ്രകാരം ചുമത്തുന്ന ഉപാധികളും നിബന്ധനകളുമെല്ലാം മനുഷ്യന്‍റെ ശത്രുവായ പിശാചിനെയാണ് തൃപ്തിപ്പെടുത്തുക. 2: 168-169, 208-210; 4: 116, 121; 6: 112 വിശദീകരണം നോക്കുക.